Бөлісу
Қазақ ән өнерінде бір естігеннен-ақ көңілге жылы тиіп, туған жердің бейнесін көз алдыңа әкелетін шығармалар бар. Солардың бірі – Бәкір Тәжібаевтың «Ақбұлақ» әні. Бір адамның балалық шағы мен туған ауылына деген сағынышынан туған бұл туынды кейін бірнеше буын сүйіп тыңдайтын әнге айналды.
Оқи отырыңыз: Бір әннің тарихы: «Заман-ай»
Бәкір Тәжібаев – қазақ әдебиеті мен өнерінде өзіндік орны бар ақын, драматург, әнші әрі сазгер. Ол 1926 жылы 15 мамырда Ақтөбе облысының Байғанин ауданындағы Ақбұлақ ауылында дүниеге келген. Балалық шағы да осы өңірде өтіп, туған жердің табиғаты, ауыл тіршілігі мен ел ішіндегі ән-жыр оның кейінгі шығармашылығына үлкен әсер етті.
Өнер жолында Бәкір Тәжібаев көптеген белгілі композиторлармен шығармашылық байланыста болды. Оның өлеңдеріне Нұрғиса Тілендиев, Әбілахат Еспаев, Ескендір Хасанғалиев, Сейдолла Бәйтереков секілді қазақ музыкасының көрнекті өкілдері ән жазды. Ақынның сөзіне жазылған туындылар қазақ эстрадасы мен дәстүрлі ән өнерінде кең тарады. Сонымен бірге Бәкір Тәжібаев өзі де ән шығарды. Сол туындыларының ішіндегі шоқтығы биігі – сөзі мен музыкасын өзі жазған «Ақбұлақ».
Әннің тарихы Бәкір Тәжібаевтың туған ауылымен тікелей байланысты. Ақбұлақ – жай ғана әнге алынған атау емес, оның балалық шағы өткен нақты мекен. Болашақ ақын сол ауылдың бұлағының жағасында ойнап өсті. Анасы бұлақтан су алса, әкесі мал суарған. Күнделікті ауыл өмірінің осы қарапайым көріністері жылдар өте келе алыста қалған балалық шақтың ыстық естелігіне айналды.
Туған жерден жырақ жүргенде Ақбұлақтың бейнесі Бәкір Тәжібаевтың жадынан өшкен жоқ. Балалық шақтың мекені, бұлақтың мөлдір суы, ата-анасының бейнесі мен ауылдың таныс көріністері кейін ән болып өрілді. Осылайша «Ақбұлақ» туған жерге деген сағыныштан, балалық шаққа деген аңсардан дүниеге келді.
Ән 1960-жылдардың екінші жартысында-ақ радио арқылы орындалып, кейін 1970-жылдары кеңінен тарай бастады. Сол кезеңде радио қазақ әндерінің ел ішіне жетуіндегі негізгі арналардың бірі еді. «Ақбұлақ» та эфир арқылы ауыл-аймаққа тарап, көп ұзамай халық сүйіп тыңдайтын шығармалардың қатарына енді.
Әнді әр жылдары әртүрлі орындаушылар өз репертуарына қосты. «Ақбұлақты» Болат Сыбанов пен Қапаш Құлышева орындап, тыңдарманға кеңінен танытты. Кейін әнді Мақпал Жүнісова, Нұрболат Абдуллин және басқа да әншілер жаңаша мәнерде шырқады. Әр буынның орындауында жаңғырып отырған туынды осылайша қазақ ән өнеріндегі өміршең шығармалардың біріне айналды.