Қалашық Жуалы ауданындағы Күреңбел ауылының батысында, Ақжар өзенінің салаларының арасында орналасқан. Қазіргі уақытта ескерткіш аумағындағы археологиялық зерттеулер жалғасып жатыр. Қазба жұмыстары ҚР Ғылым және жоғары білім министрлігінің Ғылым комитеті жүзеге асырып жатқан «Сырдария мен Қаратау ежелгі дәуірде және орта ғасырларда: мәдениеттің бастаулары мен трансформациясы» ғылыми бағдарламасы аясында жүргізілуде.

Экспедицияға Ә. Х. Марғұлан атындағы Археология институтының жетекші ғылыми қызметкері, PhD докторы Ералы Ақымбек, институттың докторанты әрі кіші ғылыми қызметкері Несіпбай Нұрғали, сондай-ақ тарихи-мәдени ескерткіштерді қорғау және қалпына келтіру дирекциясының инспекторы Жандос Байтымбетов қатысып жатыр.

Жұмыс барысында мамандар шикі кірпіштен тұрғызылған құрылыстардың қалдықтарын анықтады. Алдын ала мәлімет бойынша, бұл құрылыстар XI–XII ғасырларға жатады.

Табылған артефактілер зерттеушілерге қалашық тұрғындарының әртүрлі тарихи кезеңдердегі күнделікті өмірінің жекелеген қырларын қалпына келтіруге көмектеседі. Ғалымдар остеологиялық материалдарға, яғни үй жануарларының сүйектеріне ерекше назар аударады. Оларды талдау ортағасырлық қоныс тұрғындарының тамақтануы, шаруашылық қызметі және тұрмыс салты туралы қосымша мәлімет алуға мүмкіндік береді.

Зерттелгеннен кейін табылған материалдарды ғылыми айналымға енгізу жоспарланып отыр. Зерттеушілер қазба жұмыстарының нәтижелері Ақжардың өңір тарихындағы орнын дәлірек анықтауға және қалашықтың Қаратаудағы ортағасырлық қала мәдениетінің дамуындағы рөлін белгілеуге мүмкіндік береді деп күтеді.