Президент бұл шешімін батырдың туғанына 115 жыл толуымен және қоғам тарапынан ұзақ жылдан бері көтеріліп келе жатқан әділетті талаппен байланыстырды. Мемлекет басшысының айтуынша, Бауыржан Момышұлының ерлігі – аңызға емес, нақты тарихи деректерге сүйенетін шынайы батырлықтың үлгісі.

«Кеше Бауыржан Момышұлының туғанына 115 жыл толды. Даңқты қолбасшының нағыз ерлік жолы елімізбен қатар, шетелдерде өте танымал.  
Халқымыз оны қаһарман тұлға ретінде құрмет тұтады. Бірақ әйгілі батырға ресми түрде «Халық қаһарманы» атағы берілмеген. Облыс жұртшылығы, зиялы қауым өкілдері, тіпті, жастарымыз да осы мәселені көтеріп жүргенін білеміз. Тарихи әділдікті қалпына келтіруіміз керек. 
Сондықтан мен Мемлекет басшысы ретінде Бауыржан Момышұлына «Халық қаһарманы» атағын беру туралы шешім қабылдадым. Тиісті Жарлыққа бүгін қол қойдым, бұл құжат міндетті түрде жарияланады. 
Батырдың есімі нағыз отаншылдық пен өшпес ерліктің символы ретінде әрдайым көпке үлгі-өнеге болуға тиіс. 
Баукеңнің ерлігі жай аңыз емес, бұл – нақты құжаттармен дәлелденген, Ұлы Отан соғысына қатысқан батырлар мойындаған сөзсіз ерлік. Елге ерлігімен танылған, еңбегі сіңген азаматтарын бағалай білген жұрт ешқашан ұтылмайды», — деді Мемлекет басшысы. 

Батыр есімі – әскери тәрбиенің темірқазығы

Осы маңызды шешіммен қатар, Президент Тараз қаласына жасаған сапары барысында тағы бір мәні терең бастаманы көтерді. Мемлекет басшысы жаңадан ашылған әскери мектеп-интернатқа Бауыржан Момышұлының есімін беруді ұсынды.

«Мен бүгін Таразда жаңадан ашылған әскери мектеп-интернатқа бардым. Бұл – оңтүстік аймақтарда ашылған осындай алғашқы оқу орны. Мен мектеп-интернатқа осы өлкенің тумасы, әйгілі батырымыз Бауыржан Момышұлының есімін беруді ұсынамын.
Осындай Бауыржан мектептері барлық аймақта ашылуы керек. Үкімет бұл мәселені пысықтайды. Біз жас ұрпаққа сапалы білім беріп, оларды отаншылдыққа тәрбиелеуіміз қажет», — деді Тоқаев.

Бұл бастама батырдың рухани мұрасын тек өткеннің естелігі ретінде емес, болашақ ұрпақтың мінез-құлқы мен дүниетанымын қалыптастыратын құндылыққа айналдыруды көздейді.

Бауыржан Момышұлының бұған дейінгі атақтары

Бауыржан Момышұлы – көзі тірісінде-ақ аңызға айналған тұлға. Ол Ұлы Отан соғысында Мәскеу түбіндегі шайқастарда ерлігімен көзге түсіп, әскери тактика мен рухтың үлгісін көрсетті.

Кеңес дәуірінде батыр Ленин ордені, Қызыл Ту ордені, Қызыл Жұлдыз ордені сияқты жоғары әскери марапаттармен наградталды. Тек 1990 жылы, өмірден өткеннен кейін, оған «Кеңес Одағының Батыры» атағы берілді.
Алайда Қазақстан тәуелсіз болғалы оның ерлігі мен тұлғалық болмысы «Халық қаһарманы» деңгейінде ресми түрде бағаланбаған еді. Бүгінгі шешім – осы олқылықтың орнын толтырған тарихи қадам.

«Халық қаһарманы» атағының мәні

«Халық қаһарманы» – Қазақстандағы ең жоғары мемлекеттік атақ. Ол ел тәуелсіздігі мен қауіпсіздігі жолында айрықша ерлік көрсеткен тұлғаларға беріледі. Бұл атақ – тек жеке батырлықтың емес, ұлт тағдырына сіңірілген еңбектің өлшемі.

Бұған дейін бұл атаққа ие болғандардың қатарында Халық Қаһармандары – әскери қолбасшылар, ғарышкерлер, мемлекет және қоғам қайраткерлері бар. Олардың әрқайсысы Қазақстан тарихының шешуші кезеңдерінде елге қызмет еткен.

Бауыржан Момышұлының осы қатарға қосылуы – атақтың рухани салмағын одан әрі арттыра түседі. Өйткені ол – тек соғыс батыры емес, ұлттық намыс, тәртіп, отаншылдық туралы терең ой қалдырған ойшыл тұлға.

Бүгін қабылданған шешім – бір адамның тағдырын емес, тұтас халықтың тарихи жадын жаңғыртқан оқиға. Бауыржан Момышұлына «Халық қаһарманы» атағының берілуі – әділдіктің кеш болса да салтанат құруы.

Ал оның есімімен аталатын әскери мектептер – батыр рухының жаңа буынға жалғасатын алтын көпірі. Бұл – Қазақстан тарихындағы ерлік сабақтастығын нақты іспен бекіткен маңызды кезең.