Бұл түні музейде жиналған көпшілік қауым «Қазақ батырлары» атты арнайы театрландырылған экскурсияны тамашалап, әртүрлі тақырыптық көрмелерге куә болды. Сонымен қатар, сала мамандарының дәрістерін тыңдап, жауһар жәдігерлер мен тарихи артефактілерге қатысты бейнероликтер, деректі фильмдер тамашалап, викториналық ойындарға қатысты.
Сондай-ақ, М.Горький атындағы мемлекеттік академиялық орыс драма театры актерлерінің соғыс туралы спектаклін тамашалап, Л.Гумилев атындағы ЕҰУ студенттері мен магистранттарының «Алтын адам» атты қойылымын көрді. Қазақ хандығының 550 жылдығы мен Қазақстан халқы Ассамблеясының 20 жылдығына ерекше назар аударылды. Атаулы даталар интерактивті жобалар арқылы жан-жақты насихатталды. Акция аясында Қазақ хандығының 550 жылдығы мен Қазақстан халқы Ассамблеясының 20 жылдығына ерекше назар аударылды. Атаулы даталар интерактивті жобалар арқылы жан-жақты насихатталды.
18 мамыр — Халықаралық музей күні әлем бойынша 1977 жылдан бері аталып өтіп келеді. Сол жылы Мәскеу мен Ленинград қалаларында өткен Халықаралық музейлер Кеңесінің 11-конференциясында Халықаралық музей күнін атап өту жайлы шешім қабылданған болатын. 2014 жылы 2 шілдеде Елбасы Н.Назарбаевтың қатысуымен салтанатты түрде ашылған Қазақстан Республикасының Ұлттық музейінде «Музейдегі түн» халықаралық акциясы биыл тұңғыш рет ұйымдастырылды — деп мәлімдеді музейдің баспасөз қызметі.
Естеріңізге сала кетейік, аталмыш акция 15 мамырда жастарға арналған флэшмобпен басталған болатын. Шарада Қазақстанның қалыптасуы мен дамуы және еліміздегі музей ісінің өткені мен бүгіні туралы театрландырылған қойылым қойылған. Еліміздің барлық өңірін аралаған «Қазақстан Халқы Ассамблемясы — 20 ізгі іс» эстафетасының нышаны — Тайқазан салтанатты түрде Ұлттық музейге табысталды. Сонымен қатар, «Қазақстан» телерадиокорпорациясы музей қорына Ұлы Жеңістің 70 жылдығына арналған деректі фильмдер, басқа да құнды туындылар топтамасын сыйға тартты.
Гүлжанат ӘБДІКӘРІМ
