Кеше Астана қаласындағы Қазақстан Республикасы Ұлттық архивінде Ұлы Отан соғысына қатысқан қазақстандық майдангерлерге арналған «Батырларға тағзым» атты веб-порталдың таныстырылымы мен құжаттық көрме өтті. Бұл іс-шара – Ұлы Жеңістің 80 жылдығы қарсаңында ел тарихындағы ерлік пен бірлікті ұлықтауға бағытталған маңызды қадам.
Қазақстан Республикасы Мәдениет және ақпарат министрлігі іске қосқан «Батырларға тағзым» (https://batyrlarga-tagzym.kz) веб-порталы – Ұлы Отан соғысына қатысқан қазақстандық жауынгерлер туралы мәліметтерді жинақтаған бірегей дереккөз. Порталда қазіргі уақытта 678 331 ардагер туралы ақпарат орналастырылған, оның ішінде:
- 365 Кеңес Одағының Батыры;
- 4 екі мәрте Кеңес Одағының Батыры;
- 19 «Даңқ» орденінің толық иегері.
Бұл мәліметтер базасы – отандық тарихнамадағы маңызды жаңалық, себебі ол бұрын-соңды бір жүйеге келтірілмеген деректерді біріктіреді.
Порталға қызығушылық тек Қазақстанмен шектелмей, Ресей, Әзербайжан, Беларусь, Молдова, Қырғызстан, Өзбекстан, Түрікменстан және Украинадан 80-ге жуық өтінім түскен. Бұл ортақ тарихымызды зерттеу мен сақтау ісінде халықаралық ынтымақтастықтың маңыздылығын көрсетеді.
Іс-шара аясында ұйымдастырылған құжаттық көрмеде «Батырларға тағзым» сайтындағы ардагерлердің материалдары мен ҚР Ұлттық архивінің қорынан алынған құжаттар қойылды. Көрмеде Кәри Абитов, Тәңірберген Қалилаханов, Хамит Ерғалиев, Мәлік Ғабдуллин, Ермекқали Серікбаев сынды майдангерлердің жеке құжаттары мен майданнан жазған хаттары ұсынылды. Бұл экспонаттар соғыс жылдарындағы жауынгерлердің рухани әлемін, ерлік пен төзімділігін сезінуге мүмкіндік береді.
«Батырларға тағзым» жобасы – Ұлы Отан соғысына қатысқан қазақстандықтардың ерлігін мәңгі есте сақтау, олардың есімдерін ұрпақ жадында жаңғыртуға бағытталған маңызды бастама. Бұл – тарихты құрметтеу, өткенге тағзым ету және болашаққа бағдар жасау.
Ұлы Жеңістің 80 жылдығы қарсаңында жүзеге асырылған бұл жоба еліміздің тарихи жадысын сақтау жолындағы тағы бір маңызды қадам. Майдангерлердің ерлігі мен жанқиярлығы бүгінгі бейбіт өміріміздің негізі. Олардың есімдерін ұлықтау – әрбір қазақстандықтың парызы.
Суреттер: Ұлттық архивтің Баспасөз қызметінен
