2013 жылдың 25 қазанында С. Аманжолов атындағы Шығыс Қазақстан Мемлекеттік Университетінде Шығыс Қазақстан облысы білім басқармасының «Шығыс» өңірлік орталығымен бірлесе «Заманауи мектепте ұлттық тарихты оқытудың өзекті мәселелері» тақырыбында аймақаралық ғылыми - тәжірибелік конференция өтті.
Конференцияға қатысушыларды С.Аманжолов атындағы Шығыс Қазақстан мемлекеттік университетінің оқу-әдістемелік жұмысы жөніндегі проректоры, педагогика ғылымының докторы Г.З.Адильгазинов, ШҚО білім басқармасы «Шығыс» өңірлік орталығының директоры М.И.Асанова құттықтады.
Конференцияның пленарлық бөлімінде С. Аманжолов атындағы ШҚМУ-дың тарих ғылымының кандидаты Ә.Ә.Өскембай, Аманжолов атындағы ШҚМУ «Алтайтану» ғылыми – зерттеу орталығының директоры,тарих ғылымының кандидаты К.С. Калиева,С. Аманжолов атындағы ШҚМУ-дың Қазақстан тарихы кафедрасының доценті, тарих ғылымының кандидаты Л.ПТурова., Шығыс Қазақстан облыстық мамандандырылған дарынды балаларға арналған Жамбыл атындағы мектеп-гимназия-интернатының тарих пәнінің жоғары санатты мұғалімі Қ.Ч.Балтекенов баяндама жасады.
Конференция барысында мұғалімдер «Оңтүстік – Батыс Алтай: мәдени тәжірибелер және халық аузындағы тарихи естелік (фольклорлық – этнографиялық экспедициялар нәтижелері бойынша)» атты ғылыми семинарға қатысып, «Алтайтану» ғылыми-зерттеу орталығының жұмысымен танысты.
Конференция аясында үш секция жұмыс жасады: «Мектепте аймақтық тарихты оқыту мәселелері», «Ұлттық тарихты оқытудағы заманауи-педагогикалық технологияларды пайдалану», «Тарих сабағында оқушыларды ҰБТ-ға дайындау әдіс-тәсілдері». Алматы, Павлодар, Қарағанды облыстарының және Шығыс Қазақстан облысының жалпы білім беретін мектептерінің мұғалімдері жұмыс тәжірибелерімен және пікірлерімен алмасты.
Конференцияға қатысушылар төрт облыстың ЖОО оқытушы-профессорлар құрамы, «Алтайтану» ғылыми-зерттеу орталығы, ШҚО ББ «Шығыс» өңірлік орталығы қызметін ықпалдастырудың аудан, қала мектеп мұғалімдері арасындағы серіктестік қатынасы мен өзара сенімді нығайтудағы, ұлттық тарихты оқытудағы жан-жақты білімдік және ғылыми ынтымақтастықты кеңейтуге жаңа екпін берудегі қажеттілігі мен маңыздылығын атап өтті.
Дерек көз: dovko.kz
