Бір халық өзінің тарихын білмесе, бір ел өзінің тарихын жоғалтса, оның артынша өзі де жоғалуға ыңғайлы болып тұрады.
Міржақып Дулатұлы

Суретшілер одағының 90 жылдығына арналған халықаралық көрме ашылды

873
Суретшілер одағының 90 жылдығына арналған халықаралық көрме ашылды - e-history.kz

Кеше Мәдениет және ақпарат министрлігінің қолдауымен Ұлттық музейде Қазақстан Республикасы Суретшілер одағының 90 жылдық мерейтойына арналған «1933-2023. Қазақстан Республикасының Суретшілер одағына 90 жыл» атты Халықаралық көрменің ашылуы мен дөңгелек үстел өтті, – деп хабарлайды E-history.kz музейдің баспасөз қызметіне сілтеме жасап. 

Мәдениет және ақпарат вице-министрі Данияр Қадіров өзінің жылы лебізін білдіріп, министр Аида Балаеваның құттықтау сөзін жеткізді. «Қазақстан Суретшілер одағы суретшілерімізді ел ішінде және шетелде насихаттап жүрген шығармашылық ұйымдардың бірі де бірегейі. Осы мүмкіндікті пайдалана отырып қылқалам шеберлеріне шығармашылық жетістік, мол табыс, шабыт тілеймін!» делінген министрдің құттықтау хатында.

Сөз кезегін алған Қазақстан Суретшілер одағының төрағасы, Қазақстан Республикасының еңбек сіңірген қайраткері Өмірбек Жұбаниязов халықаралық көрмеге 10 мемлекет қатысып жатқанын жеткізді. «Бұл жыл біз үшін ерекше жыл. Одақтың 90 жылдық мерейтойына куә болып жатқанымызға қуанышымыз шексіз. Бұл көрменің басты ерекшелігі – 10 мемлекет қатысып, бізге қолдау көрсетіп отырғаны. Осы шетелдік суретшілердің шығармалары ҚР Ұлттық музейі мен Ә.Қастеев атындағы өнер мұражайының қорларына тапсырылады. Барлық әріптестерге, Мәдениет және ақпарат министрлігіне, Ұлттық музей ұжымына, Астана Суретшілер одағына алғысымды білдіремін», деді ол.  

Мәдениет саласының үздігі, көрме кураторы Гүлнар Жуваниязованың айтуынша, Суретшілер одағының 90 жылдық мерейтойы осы бір жылдың ішінде әр облыста аталып өткен. «Бүгін біз осы өткен іс-шаралардың қорытындысы ретінде Одақтың 90 жылдық жұмысының нәтижесін паш ететін көрмеге жиналып отырмыз. Көрмеге ата буын, орта буын мен жас суретшілердің жұмыстары қойылып, Одақтың тарихынан сыр шертеді», деді Г.Жуваниязова. 

Көрмеге жергілікті және шетелдік 226 шебердің 270-тен астам туындылары қойылды. Олар: кескіндемелік және графикалық жұмыстар, мүсін, гобелен, керамика және киізден жасалған бұйымдар, кесте секілді туындылар.

Әрбір картина халықтың өмірі мен тұрмысы, тәуелсіздік алғанға дейін болған оқиғалар, қазақ халқының мәдениетін дамытуға үлес қосқан не Ұлы дала тұрғындарының сан ғасырлық арманына қол жеткізуде елеулі рөл атқарған тұлғалар туралы баяндайды. Қоршаған ортаның үйлесімділігі, мифтер мен ежелгі құпиялар, қазіргі қала мен дала өмірінің тынысы, оның атмосферасы тақырыптық бағыттағы жұмыстарда көрініс тауып, осы уақытқа дейін жалғасып келеді.

 

Суреттер Ұлттық музейдің баспасөз қызметінен

Автор:
Сауалнамалар
Алтын Орда (Ұлық Ұлыс) мемлекетінің мұрагерлері кімдер?