«Бүгінгі күнді түсініп-түйсіну үшін де, болашақтың дидарын көзге елестету үшін де кешегі кезеңге көз жіберуіміз керек»
Н. Ә. Назарбаев

13 наурызда Елбасы кітапханасы бір жылдығын атап өтті

3159
13 наурызда Елбасы кітапханасы бір жылдығын атап өтті

2014 жылдың 13 қаңтарында Мемлекет басшысы «Қазақстан Республикасының Тұңғыш Президенті — Елбасының кітапханасы» мемлекеттік мекемесінің кейбір мәселелері туралы» Жарлыққа қол қойды. Енді осы айтулы мекемеге бір жыл толды. Осы оқиғаға орай Қазақстан Республикасы Президенті Кеңсесінің бастығы, «Қазақстан Республикасының Тұңғыш Президенті — Елбасы кітапханасы» ММ директорының міндетін атқарушы Махмұд Қасымбеков салтанатты жиын өткізді. 

Іс-шараның ашылуында сөз сөйлеген Кітапхана директорының міндетін атқарушы М.Қасымбеков президенттік кітапхананың жұмыс істей бастағаны Қазақстанның қоғамдық өмірі үшін маңызды оқиға екеніне тоқталды. «Пайда болған бұл жаңа дәстүр республикамызда алдыңғы қатарлы халықаралық тәжірибе арнасындағы президенттік институтты нығайтуға, сондай-ақ ұзақмерзімдік перспективадағы мемлекеттің дамуындағы тарихи мұраны және саяси бірізділікті сақтауға бағытталған», — дейді Кітапхана директорының міндетін атқарушы. 

Кітапхананың жүрегі — жинақталған қоры. Бүгінде мұнда 40 мыңнан аса кітап пен журналдар, Мемлекет басшысының жеке мұрағатынан 101 мыңнан астам видео-, аудио-, фотоқұжаттар және басқа да дәстүрлі құжаттар, сондай-ақ Нұрсұлтан Назарбаевтың өмірі мен саяси қызметіне қатысты 700-ге тарта түрлі жәдігер сақтаулы. 

Кітапханада қазірдің өзінде еліміз аймақтарынан келген қонақтар мен шетелдік делегацияларға, олардың арасында мемлекет басшыларына да таныстыру экскурсиялары өткізілді. 

«Елбасы Кітапханасының міндеті кітапханалық-мұрағаттық немесе экспозициялық-көрме қызметімен шектелмейді», — деп атап өтті М.Қасымбеков. Мекеме жұмысының өзекті бағыттары — Президенттің жұмыс кестесін ғылыми-талдамалы тұрғыдан сүйемелдеп отыру, сондай-ақ Мемлекет басшысының стратегиялық бастамаларын қолдау мақсатында идеологиялық және қоғамдық іс-шаралар атқару. 

9ce6a314827093b77fb1818219f14447.jpg

Осы тұрғыда былтыр өткізілген іс-шаралар ішінде мыналарды атап көрсетуге болады: 5 мыңнан астам ұстазды қамтыған «Әлемді өзгертетін идеялар» республикалық «дөңгелек үстелдері», «Тұңғыш-Первый» кино апталығы, Н.Назарбаевтың қазақ тілінде сөйлеген сөздерінің таңдамалы көп томдығының, «Біздің Президент» кітаптарының таныстырылымы және басқа да қоғамдық маңызды жобалар. 

Бүгінде еліміздің Тұңғыш Президенті туралы кітаптар Кітапхананың желісімен дайындалып, ағылшын, неміс, мажар, қытай, араб, түрік тілдерінде шығарылды. Олардың Берлинде, Будапештте, Бейжіңде, Дубайда, Ыстамбұлда өткізілген таныстырылымы аталған елдер жұртшылығының үлкен қызығушылығын туғызды. 

Халықаралық ынтымақтастықты дамыту бағыты бойынша ұлкен істер атқарылды. Мәселен, Қазақстан Республикасының Тұңғыш Президенті — Елбасы кітапханасы мен Германияның демократиялық жолмен сайланған алғашқы рейхс-президенті Фридрих Эберт атындағы қор арасында ынтымақтастық жөнінде уағдаластыққа қол қойылды. Осы тектес уағдаластық Қытайдың қазіргі заманғы халықаралық қатынастар академиясымен жасалды. Өткен жылы Кітапхана АҚШ, ҚХР, Жапония, Үндістан, Еуроодақ елдері, Орта Азия және Кавказдың барлығы 32 белгілі ғылыми орталықтарымен сындарлы қарым-қатынас орнатты. 

Шара соңында Қазақстан Республикасы Президенті Әкімшілігі атынан жаңа ұйымның қалыптасуы мен дамуы жолында зор үлес қосып жүрген қызметкерлерге алғыс хаттар табыс етілді.

Қосымша ақпарат:

1f267e575639da3780c76aa8af3d19ec.jpg

Мемлекеттік мекеме (ММ) ҚР Президентінің 2014 жылдың 13 наурызындағы № 767 «Қазақстан Республикасының Тұңғыш Президенті — Елбасының кітапханасы» мемлекеттік мекемесінің кейбір мәселелері туралы» Жарлығымен құрылған.

Елбасы кітапханасының ерекшелігі — қазіргі билік басындағы Мемлекет басшысының орталығы екендігі. Президенттік кітапханалардың тарихында мұндай жайт тек АҚШ-та ғана, оның өзі бір-ақ рет орын алды. Билік басында отырған кезінде президент Франклин Рузвельт өзінің президенттік орталығын жасақтады. Соның негізінде кейін оның есімімен аталған кітапхана-мұражай бой көтерді.